نبطل متعة ما نفعل

نبطل متعة مانفعل

بقلم د حمدينو

وجهة نظر خاصة جدا وغير عامة
• مبحبش التصوير، وبخاف من الكاميرات ، وصورى بتطلع غالبا وحشه ، ونادرا أما بيبقى لى صورة عدلة ، مبحبش أعمل أى حاجه قدام كاميرا حتى لما بحاضر فى مدرج أو بشرح بشكل خاص لمجموعة صغيرة ، قليل لما بسمح لطلبة يصورونى ، وبعتبره نوع من الدعاية اللى مبحبهاش .
• كنت بفضل أشرح صوتى واحاضر صوتى فى الجزئيات النظرية ، وفى التجارب المعملية ، كنت بمنع بشكل كبير تصوريها وبكتفى بصور المنهج اللى شارحه الجزئية دى ، وعامل صفحة عامة هى فقط للعمل ومفيش عليها ولا حد من اللى على صفحتى دى ؛ ده عشان الطلبة يشعروا بخصوصية الصفحة وميجوش كل شويه هنا ومفيش هنا غير اتنين تلاته منهم اللى ليهم أصلا فى الادب =D .
•لما بعمل حاجه لحد مش بأقعد كل شوية أقوله أنا عملت لك كذا ، بعمل وبنفى عن نفسي حتى إعتبار إنى ساعدته، حتى فى امتحانات الشفوي ، كنت بساعد والله ، ولا يرسب عندي إلا من لم يذاكر إطلاقا .
بعتبر إنى عشان أساعد حد وأصور نفسي فى مشهد إنى بساعده نوع من النفاق الاجتماعى .
• إذا حبانى الله بموهبة ما فلازم (لازم ) أخدم الناس بيها ، ومش بتفضل عليهم لأ ده بيبقى واجب .
•كذلك إذا أوتيت سُلطة ما ، لازم بكل تواضع أخدم برضه الناس بيها بدون ما أظهر فى الصورة أصلا ولا أبان حتى بمظهر إنى بساعد أو بخدم وممكن من بعيد كمان من غير ما حد يعرف وده أفضل .
أى حد تعمل له أى حاجه مش لازم تحسسه إنه مكنش هيعرف يعملها من غيرك ، أصل ممكن غيرك يعملهاله .
فى أكتر من صورة كانت بتلفت نظري جدا، جمعيات خيرية بتوزع كفالة او مساعدة فى احتفال وتصور اللى بياخد الحق ده كام صوره وهو منكسر او بيبتسم ابتسامة ميته !
إحتفال؟ عشان توزع شوية أكل وللا شوية ملابس طب ليه ؟
ساعدوا الناس من غير ما تحسسوهم ولما تواجهوهم مش لازم كل مرة تعرفوهم إنكوا ساعدتوهم ، كفاية شعور الامتنان اللى بيبقى الشخص ده حاسس بيه ، ويكفيك شعور الفضل المعنوي اللى جواك .
○◘○◘○◘○◘○◘○◘○◘○◘○◘○◘○◘○◘○◘○◘○◘○◘○◘○◘○
كل سنة وانتوا طيبين
#رمضانيات