بوابة الاخبار : بدائل طبيعية لتنضيف البشرة من غير صابون

البدائل الطبيعية :-

1-اللبن:

تدليك البشرة باللبن يعتبر وسيلة فعالة جدا للتخلص من الجلد الميت وترطيب البشرة, وكمان يعتبر مطهر طبيعي وبيساعد على تهدئة تهيج الجلد وشفاء الجروح, ببساطة ممكن تستخدمي اللبن لوحده تدلكي بيه بشرتك, او تخلطي معاه عصير ليمون او بابايا مهروسة.

2-عسل النحل:

يعد العسل مرطب طبيعي للبشرة وبيديها نضارة ونعومة, بالاضافة لده ان العسل فيه خصائص مهدئة للبشرة وبيمنع التهاب واحمرار الجلد ، دلكي بشرتك بالعسل لوحده في حركات دائرية وبعدين اغسليه بالمية, او ممكن تضيفي على العسل لبن وتدلكي بيه البشرة كمنظف ومرطب هايل جدا للبشرة, او تضيفي عليه معلقة صغيرة صودا الخبز كمنظف ومقشر للبشرة.

3-الليمون:

الليمون معروف بخصائصة المطهرة والمبيضة للبشرة, ممكن تدهني عصير الليمون بشكل مباشر على البشرة, لكن لو بشرتك حساسة ممكن تخلطي معاه زبادي وتسيبيه على البشرة من 10 – 15 دقيقة وبعدين اغسليه بمية دافية.

4- مية الورد:

تعتبر مكون مثالي جدا لتطهير البشرة وترطيبها وكمان بتدي لون وردي طبيعي للبشرة, هاتي قطن قطعية قطع صغيرة وبليه كويس جدا بمية الورد ووزعيه على بشرتك كلها وخصوصا المناطق اللي بتفرز دهون زيادة زي الجبين والدقن والانف وسيبيه شوية لحد ما تحسي انه القطن نشف من مية الورد.

5-الخيار:

عصير الخيار من المكونات الفعالة جدا في تنضيف وترطيب البشرة والحفاظ على نضارتها, ومثالي جدا للاستخدام على البشرة الحساسة والجافة, ادهني بشرتك بعصير الخيار سيبيه ينشف واغسليه بالمية, كرريها من 2 – 3 مرات في الاسبوع لمدة شهر هتغير بشرتك تماما وهتخليها صحية.

6-الافوكادو:

الافوكادو مطهر ومنظف ومرطب طبيعي للبشرة وكمان بيغذيها, اهرسي الافوكادو وضيفي له كام نقطة من عصير الليمون ودلكي بيه بشرتك.

7-عصير البطيخ:

عصير البطيخ منظف ومرطب للبشرة وخصوصا لو بشرتك جافة هيكون مفيد جدا لانه بيحافظ على رطوبة البشرة, ادهني بشرتك بعصير البطيخ بشكل يومي, ولو بشرتك دهنية ممكن تضيفي له جل الصبار.

8-البابايا:

فاكهة البابايا مصدر غني جدا بالمواد الغذائية زي فيتامين سي, وفيتامين بي, والانزيمات والمعادن, ولب البابايا بيحتوي على مجموعة متنوعة من المواد النباتية بما فيهم مادة البوليفينول ودي من المواد المضادة للاكسدة اللي بتحافظ على شباب ونضارة البشرة.دلكي البشرة بشريحة بابايا, او اخلطي البابايا المهروسة مع عسل نحل او مية ورد وحطيه كقناع على البشرة لمدة من 15 – 20 دقيقة وبعدين اغسليه بالمية.

9-زيت جوز الهند:

حطي معلقة صغيرة من زيت جوز الهند على ايدك ودفي الزيت بانك تفركيه في ايديكي كويس جدا وبعدين دلكي بيه بشرتك في حركات دائرية لمدة دقيقة, بعدها هاتي قماشة نضيفة وبليها بمية سخنة واعصريها كويس وحطيها على وشك لمدة 30 ثانية وبعدين امسحي بيها الزيت من على البشرة, الطريقة دي هتنضف البشرة وهترطبها جدا.