اديله برستيجه يا سعاد حاجتين يخسروكى أى راجل بيحبك
حاجتين يخسروكى أى راجل فى الكون بيحبك
بقلم ،، رشا عامر
– العتاب والتقطيم
الرجالة مش بتحب الزن واللوم والفتى والرغى والملاحقة والتقييم والعتاب
وانك تقولى ملاحظة من غير ما يطلبها منك
تبانى أذكى يحس أنه أغبى يكش منك على طول ..
اديله برستيجه يا سعاد
مش بيحبوا الايقاع السريع والبنت إللى لاقطة رجل النملة
اسكتى شوية
خليكى مركزة بنسبة كبيرة فى حياتك وشعرك وضوافرك وحطى ماسكات ماسكات كتير بقى واتفرجى على أفلام واقرى كتب اشغلى نفسك وطلعى طاقتك فى حاجات غيره
شغلك وأحلامك والجيم والنت وهدومك
ده مش اهمال لكن تفريغ طاقة الزن بعيدا عن ودانه
وشحن طاقة ايجابية بعيدا عن التحميل عليه هو بس !
طب يعنى أمتى اعاتبه ؟
لما يعمل جريمة تستحق النكد لكن لو ماردش على تليفونه أربع مرات مش قضية نامى وفكك منه
لو بيخونك هتعرفى ..
ولو نايم هتعرفى ..
وفى الغالب عنده إسهال من العك إللى أكله من الشارع
وفى الحمام بايت هناك
الرجالة أبسط من كل خطط الستات إللى بيحطوها
والشيطان جنبهم على الكنبة
هو بيلعب بلاى ستيشن أو بيشوف ماتش الأهلى والزمالك
ومسقط لكن لسه بيحبك عادى .. لا تقلقى
عدم تقدير مجهوده
من وجهة نظره أنه سوبر مجهود ومن وجهة نظرك عادى
خليكى مجاملة بعيدا عن الكذب
يعنى مايبقاش نازل معاكى ببدلة بلايتشو وتقولى له أنا معجبة بشياكتك .. ده كذب يا مدام
لكن لما يدوقك مكرونة طابخها لك قوليله أول كلمة
حلوة .. تجنن .. حبيت
بلاش سخافة التفاصيل، لو أول جملة هتنطقيها .. ناقصة ملح كده خسرتيه خلاص
طز فى المكرونة كفاية وقفته وحنيته .. ننظر للايجابيات
وفرى صراحتك للشيف شربينى على التليفون .. كلميه وقولى اللى فى نفسك على الهواء ما يهمكيش فضفضى
طب كده بنافقه
لا بجبر بخاطره
تحبى تلفى حلة محشى ويجى يقولك خلطته ناقصة طماطم ويكبسك !
جبر الخواطر بيطول عمر العلاقات بعيدا عن الكذب والنفاق
لكنه حنية ورصيد محبة وطبطبة
العالم ملىء بال
كثير من القسوة
ليكن الحب الحتة الطرية فى يومنا