يا بلادى………….رشاد الدهشورى
يا بلادى………….رشاد الدهشورى
أنت الحب الأكبر أنت
وأنت الحاضرأنت
وأنت الماضى وأنت الأتى
أنا قلبى موجوووع من حبك
ومهما هتقسى عليا أنا راضى
أنا عاشقك
أناعاشق نيلك
ومهما حصلى
هتوضى واصلى واغنيلك
لو عا لجوع
أنا ممكن اموت م الجوع علشانك
ولو موجوع
يكفينى انى فى احضانك
بس أنا عاتب
غصبن عنى لازم أعاتب
ليه يا بلادى بتدى الطماع كل ماليكى
أما أنا كاتب أغانيكى
لازم اعيش مستنى الراتب
والراتب حبة ملاليم
مايكفوش بطاطين ومراتب
الغلبان فيكى غلبان
والغيلان بينهبوا فيكى
وبترقيهم وتعليهم
ويعشوا فى قصور ومواكب
أما أنا العاشق لترابك
هفضل ماشى
وغيرى الراكب
ورغم دا كله بحبك مووووووووت
وخايف اموت
وانت لسه محساش بيه
ليه يا بهيه فاسية عليه
اللى يحبك تديه ضهرك
يلف يدور ويقف فى طابور
والمسعور يسكن فى قصور
ياكل كل خلايا النحل
ويخلف مليون دبور
واللى يحبك
اللى بيزرع فيكى ويقلع
عايش فيكى كما العصفور
لو بنى بيت لولاده قضيه
لو يتكلم عا الحريه
الف قضيه..
ويحطوه ويا الحراميه
ويقولو خاين للوطنيه
اما الغول اللى ابوه غول
ورث الدنيا عرض وطول
يمسك قاضى عليا ويحكم
ويقولوا شاعرمجنون رسمى
ويقولو ارهابى ووهابى
وينشروا صورتى وشكلى واسمى
والدبابير تهتف وتنادى
تسلم الايادى
ليه يا بلادى
دنا عاشق للأرض
وعايش جوا الحيط
حتى الحيط اللى مخبينى
أخدوه منى
يا بلادى أنت الحب الأول أنت
وأنت الحب الأخر
بس انت جيباها معايا من الأخر
ازرع وحيتانك تحصد كل غيطانى
وفى عز البرد أنا بسقى الورد
واكتبلك مواويل وأغانى
اناعاشق تبرك وترابك
انا اللى زارع والى بانى
ولو اتكلم او اتظلم
تلقى الدنيا بحالها تضلم
ويزفونى ويقولوا أنانى
يابلادى والله بحبك موووت
انا شايفك احلى عيون وشفايف
أنا شايفك أجمل من ميت بنت بنوت
أنا شايفك دنيا جميلة بتنبض حب
مش بس حديد وشجر وبيوت
يا بلادى بعدين وياكى
بس عليا تحمرى عينك
وتقفلى كل بيبان العدل فى وشى
وتطلقى كل كلاب الغل عليا
ليه يا حبيبتى ؟؟
يعنى ترضى اسيبك وامشى
يعنى أهاجر واسيب عشى
والله اموت ومفارقيش
ولوهاعيش على مش وعيش
أنا شاعرمدبوح من ظلمك
بس بحبك ..
غصبت عنى أنا هعمل ايه
أنا مصرى وبحبك موت
عايش فيكى كما العصفور
والصياد من الأسياد
وأنا مستنى يصيبى الدور
أنا فلاح وهوايتى الخير
أضرب فاسى فى قلب العتمة
تلقى الأرض تنبت نور
قولى يا بلادى اعملك ايه
أسيب الفاس واعملك بيه
طب ليه ؟؟
والله برغم دا كله بحبك