وجع الفراق

#وجع_الفراق

كتبت عالية الشيمي

عشان تسهل على نفسك وجع الفراق لازم تفارق بهداوة
الفراق اما بيجي بالهداوه مبيبقاش فيه رجوع ..
انما اما اتنين بيسيبوا بعض مرة واحدة بعد مشكله بينهم سهل جدا مع شويه عتاب صغيرين يرجعوا لبعض ..
عشان كدا اما تحس انك محتاج تنهى علاقتك بحد، متاخدهاش خبط لزق…
استنى جنبه و سيبه يساعدك، علشان طالما وصلت لمرحلة انك قررت تبعد أو اقتنعت أن البعد واجب، كل حاجه و اى حاجه منه هتبقى بتساعدك.

سيبه يخيب ظنك و يخذلك واحدة واحدة، يقل من نظرك واحدة واحدة، يوجعك واحدة واحدة، يبعدك عنه واحدة واحدة…
ساعتها بس هتحس انك استنفذت كل طاقتك معاه و البعد مش هيبقى قرار بيوجع هيبقى مشيئة مريحه، سيبه يدمر كل فرصه له بالبطئ و هتلاقي وجوده و غلاوته بتتلاشى من كيانك واحدة واحدة بدون وجع أو تأنيب ضمير أو حكم للعشرة.

هتمشى و انت مش ندمان و لا هتبص وراك لأنه ببساطة هو اللى عمل كده و ساعدك تخرجه من حياتك. الناس هى اللى بتحط نفسها فى الاماكن فى قلوبنا و حياتنا بتصرفاتها مش بكلامها أو باختيارنا
وهم برضو اللي بيخرجوا نفسهم من قلوبنا وحياتنا بتصرفاتهم
الفراق عن قناعة حقيقي مريح …