.مش مثالي. شعر
Get real time updates directly on you device, subscribe now.
مش مثالي
أنا مش مثالى
ولا حتى عايش بدّعى
أنا حد أبسط م البساطة
لو جيبى مليان ولا حتى ع البلاطة
طيب ساعات وساعات فظيع
عصبي ..تشوفينى ترجعى
بعرف أحب وأقول كلام
ومعاكى ع التليفون أنام
وأقدر أفارق لو كرامتى مستيها..وأعرف أقول مليون سلام
بسمع واحبك تسمعى
أنا زى كل الناس بروح مسرح وسيما
لكن الفلوس فى عينيا ملهاش أي قيمة
مابحيبش اللبس المحزق
لو يوم أغير ممكن أهزّأ
فى الصح أنا دقة قديمة
أحن واحد لو فى ثانية تضعفى
لكن شديد وقت الغلط
لو يوم حاولتى توجعى
جوايا ليكى حب صعب تقدريه
لكن ماينفعش إنى أقول كلمة بحبك..وسط ناس
ولو هقولها..هقولها ليه
مااعرفش أركع وأبقى ماسك دبلة ليكى
عشان اقول تتجوزينى
مش قسوة منى صدقينى
دى تربية ..ومبدأ وحق
مااعرفش اقول للصح لأ
وده اللى أنا اتربيت عليه
لو حاسسة إنى هكون تقيل
ارجوكى من بدرى اخلعى
أنا مش أنانى ..ومش بحب السيطرة
ومش بحب الفشخرة
أبان روش ..لكن أنا راجل حمش
وتلاتة بالله العظيم..لو حتى كنت ببان وسيم
أنا حد جد ..وجد جدا بالقلم والمسطرة
فى ناس كتير ممكن يقولوا
إن أنا هجيبك ورا
وإنى عادى بجد أسيبك تولعى
ده مش حقيقى..
أنا بس هفضللك غطا
مش هرضى ليكى المرمطة
هتلاقى واد راجل سند
عليكى بيرسّى العطا
لكنى حر ودمى حر
ولو هدوق المر..حر
وعقلى ضد المغنطة
مش هنفعك لو عايزة شئ م السهوكة
لكن فى قلبى هتسكنى وتتربّعى
أنا مش مثالى
ولا حتى عايش بدّعى
الشاعر محمد السادات