لماتحب حدبجد

لما تحب حد بجد .. خليه اول اهتماماتك ؛ و كل وقتك و شغلك الشاغل يبقى هو.

لما تحب حد بجد .. خليه صاحبك وحبيبك و امك و ابوك وخالتك لو لزم الأمر.

لما تحب حد بجد .. متنامش وانت شايل منه .. روح عاتبه ، وخلى فى مجال للعتاب ، البعد والقسوه بيعلموا الجفا ..

لما تحب حد بجد .. متعملش حساب الفراق والايام والبعد ؛

عيش لحظاتك معاه كأنها الاخيره لك فى الحياه ،وعيش لحظات البعد كأنكم هترجعوا تانى مهما كان حجم خلافاتكم ..

لما تحب حد بجد .. خليك دايما متاح .. بمعنى انه مفيش شغل ولا هموم ولا اى شئ فى الدنيا هتخليه يكلمك وترد عليه بــ ” معلش كنت مشغول شويه ” . .

اوعا تقول الجمله دى مهما كان حجم مشاغلك ومشاكلك

لما تحب بجد .. اذكره بالخير فى البعد قبل القرب ، حتى لو هو ميستاهلش ده ، لكن انت تستاهل . دفاعك عنه قدام الناس هو قوة .. و عتابك ليه وانتوا مع بعض ده منتهى القوه

الحب ممكن يكون اساس اى علاقه حلوه ، بس فى حاجات تانيه من غيرها مش هيكمل وهيبقى زيه زى الفريق اللى ماسك الكوره طول الماتش بس مبيعرفش يجيب اهداف .

بس قبل ماتعمل كل اللى فات اتأكد انه بيحبك بنفس القوه وقبل الحب انه يكون صادق معاك فى كل حرف بيقوله .

* وزى ما قالت الست ” العيب فيكم يا فى حبايبكم ” ..

اما الحب يا روحى عليه ♥