الرئيسية / خواطر / وداع بدون استئذان

وداع بدون استئذان

وداع بدون استئذان

كتبها / الكاتب يوسف الصياد

ماكنتش عارف اكتب ايه النهاردة.. كلنا قلوبنا موجوعة اووي من اللي حصل والناس اللي ماتت بابشع طريقة.. بس دة يخلينا نفكر ونعيد حسابتنا في كل حاااجة..

الموت اقرب لينا مما نتخيل او نتوقع.. في لحظة ممكن نضيع وننتهي ونبقي مجرد ذكري في الدنيا..
في لحظة ممكن نفقد اقرب الناس لينا ولقلوبنا..
مافيش وقت حتي نودع حد .. او نستسمح حد…
مافيش وقت نعتذر ..
مافيش وقت نعبر للي احنا بنحبهم… احنا قد ايه بنحبهم..
مافيش وقت نشبع من ناس كنا فاكرين ان الموت مش هيخطفهم مننا بسرعة كدة ..
مافيش وقت نقرب من ناس بعدنا عنهم لاسباب تافهة ومالهاش قيمة
مافيش وقت لاي حاجة خااالص.. كل حاجة بتخلص وتنتهي في غمضة عين..

الدنيا اتفه واقل بكتييير من اننا نتخاصم ونتخانق عشانها وعليها..
الدنيا اتفه بكتيير من ان حد بتحبه يضيع منك وانت مزعله او متخاصم معاه..
راضو حبايبكم.. صالحوهم وفرحوهم.. مش مهم مين غلطان.. مش مهم مين يبتدي بالصلح..
المهم انك ماتكونش مزعل حد.. ولا زعلان من حد..
المهم انك ماتظلمش حد.. ولا تدوس علي قلب حد.. ولا توجع حد… ممكن يضيع في لحظة وتعيش عمرك كله تندم انه فارقك وهو زعلان منك او في قلبه حاجة ناحيتك..
ساعتها الندم هياكل قلبك.. وهتقول ياريتني.. بس بعد ايه !!!

سامحو بعض.. عيشو بقلوب صافية.. بلاش كره وحسد وغيرة وحقد… بلاش تكرهو الخير لبعض.. محدش ضامن عمره ولا ضامن حياته…
خليكو لما تروحو تكونو عالاقل سايبين ذكري حلوة لكل اللي حواليكم..
اشبعو من حبايبكم.. قربو منهم.. ماتكتموش جواكم كلمة حلوة او مشاعر لحد بتحبوه.. ياعالم هتشوفوه تاني ولا لاء.. الفرصة اللي بتضيع ياعالم هتتعوض ولا لاء..
الوجوه اللي بتغيب ياعالم هتتقابل تاني ولا لاء..

سبحان الله لسة كنت بتكلم عن النقطة دي في قصة كنت بكتب فيها من فترة
. الايام مابتستناش حد.. والموت مابيفرقش بين شاب او عجوز…
والوجع والندم مابيرحمش..

ماتأجلوش حاجة هتفرحكم او هتفرحو بيها حد..
ماتأجلوش احلامكم.. ماتأجلوش توبتكم عن اي ذنب..
ماتأجلوش اعتذاركم لحد زعلتوه.. ماتأجلوش قربكم من حبايبكم… ماتأجلوش اي حاااااجة.. لان للاسف
الموت مابيستأذنش 💔

شاهد أيضاً

إشارات مارس 2019 بقلم/ محمد مأمون ليله

إشارات مارس 2019 بقلم/ محمد مأمون ليله القلب كالسفنجة، كلما ابتلي وعصر؛ حُبس ما يخرج …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *