نافذتك على الأخبار العالمية والمحلية

تربيه

76

#تربية!!

 

كتبت عالية الشيمي

 

عرف الأب ان بنته اللي في اعدادي مرتبطه بشاب زميلها في الدرس

وطبعا الأم لما عرفت قعدت تصرخ وجابت الشبشب ابو ورده وهاتك ياضرب في البنت

لكن الأب كان حكيم جدا

في مرة من المرات وهو راجع من شغله جاب لبنته ورده هدية

فرحت البنت بيها وفضلت وخداها في حضنها طول الليل

لحد ماتاني يوم الصبح قالها انا عازمك انتي وماما علي الغدا انهارده في حديقة جميله خالص

طول الطريق الأم بتقول للأب .. هتكلمها في الموضوع اياه ولا اجبها انا من شعرها

والأب يقولها سبيلي انا الموضوع ده واهدي .. ده مش اسلوب تعليم خالص

تقوم الأم تقوله ، ده بدل ماتحبسها في البيت اسبوعين تلاته تقوم تخرجها وتفسحها كمان ؟ ده محدش بوظها غيرك ، منظري ايه دلوقتي قدام الناس وهم بيقلولي بنتك على علاقه بفولان

الأب يقولها اهدي بس ، جيلنا مش زي جيلهم ، هتحبسيها في البيت هتقدر تتكلم مع ميه غيره علي النت

ان مقدرتيش تعالجي اساس التفكير يبقي عقابك كله مش هيجي بأي فايده ..

المهم وصلوا الحديقة وبدأوا يتفرجوا علي جمالها وجمال الزهور اللي فيها

اعجبت البنت بزهرة شكلها والوانها كانوا حلوين جدا

فقطفتها ، فلما الاب شافها قالها إنتي معاكي ورده انا جايبهالك .. ليه تبصي علي غيرها

اتكسفت البنت وقالتله .. سامحني يا بابا .. الورده اللي انت اديتهاني كانت حلوة وعجباني جدا فعلا بس ده لأن مكنش قدامي غيرها ، لكن لما جيت هنا الحديقه وبدات اشوف الوان واشكال كتير حسيت ان فيه ورد افضل بكتير من اللي كانت معايا

هنا ابتسم الأب وقال .. عشان كده يا بنتي مينفعش نحب حد لمجرد انه اول شخص قابلناه في حياتنا ، ولأننا مقدمناش غيره .. لأن اكيد اعجابنا بيه هيكون لمجرد اننا منعرفش افضل منه ، وهيكون اعجاب وقتي لحد مانقابل غيره

ادي لفكرك فرصة يختلط ويشوف ويعرف ويتعلم من الناس اللي هيقابلهم في حياته في المراحل الجاية .. علشان لما تختاري .. يبقي اختيارك افضل اختيار ، ومتستعجليش ، الحياة هتعفك كتير علي مدار سنينك الجايه

ماتحبيش علي نفسك علشان متورطيش نفسك

انتوا كمان علموا اولادكم كده بدل ماتقعدوا تخوفوهم وتضربوهم

عرفوهم بالعقل علشان يقتنعوا ، مش بالضرب وقلة القيمة اللي مش هتحصدوا من وراها غير دفن راسكم في الرمل

قد يعجبك ايضا