الرئيسية / أحزاب وبرلمان نقابات / بوابة الاخبار : الوطن والوطنجية

بوابة الاخبار : الوطن والوطنجية

الوطن والوطنجية

بقلم :- مي مجاهد

طول عمري اعرف ان في ناس وطنينن بيبقوا بيحبوا الوطن كده ومتعلقين بيه لكن واضح انه بقي في افورة في حب الوطن خلت ناس كتير عدت مرحلة الوطنية بكتير .

والغريب إن الناس دي عايشة الدور واللحظة وكأنهم فدائين لما يرفعوا الضغط .. اه والله زي مابقولك كده لحد ما الواحد بقي زي عواجيز الفرح، في الفرح منسية وفي الهم مدعية … البلد هتروح حاضر لازم نتحمل حاضر لازم نشتغل حاضر لازم الهم يكبرنا وماله بلدنا لازم لازم حاضر حاضر ،

طيب وفي الفرح اي لقطة طيب … لأه بره الكادر … دايما ناقص فرحتي حاجه بتيجي تسرق مني الضحكة اللي بجد ، ومش أنا لوحدي ، ابسلوتلي ، أنا زيي كتير أوي بنات وشباب أكثر بنعيش اليوم بيومه شايلين هم بكرة أكثر من أهالينا حتى الفرحة بتروح في ساعتها ونسرح و نفضل نحسب اللي جاي ،

كنت بشجع البلد في المشاريع والإصلاح الإقتصادي حتي لو قطم ضهري ووسطي وسيحت من الشمس في الافتتاحات لما وشي وقع علي الكباري بس معلش ضهر البلد أهم لازم ندعم ونسند ونشجع ونؤيد.

اتحرق دمي واتشتمت من الإخوان واللجان واتلعن سلسافيل جدودي واضايقت من هرتلتلهم وقولت معلش مرحلة وهتعدي والشتيمه مبتلزقش يعني واهي كلاب بتهوهو منهم لله بلدنا أهم طبعا ..

فرحت إننا وصلنا كأس العالم بعد غياب 28 سنة أنا شخصياً موعاش علينا في المونديال خالص ولا حتى شفت جون مجدي اساساً ،

انشكحت في إفتتاح كأس الأمم الأفريقية … ياسلااام إفتتاح تحفة تنظيم روعة صور مبهرة حاجه عظمة تليق بمصر وجمالها بقي .

لفيت محافظاتها ومشاريعها كعب داير ومطلبتش حاجه بالعكس حاسه بكل فخر وعزة وكنت بشجع من قلبي وبقوة وبإيمان حبيت نجاحنا وعيطت مع أي فشل أو هزيمة ودعيت ربنا أنا وكل قلوب المصريين اللي ياما شافت غُلب ووكسة كل ده تمام … بس فجأة تحس قلب الواحد أتقبض وشعور عارم كده بالقرف لا مؤاخذة والخوف من النحس بعد ما شاف النخبة اللي راحت عملت فيديو مساندة الريس و ياريتها ما راحت ولا جت ، نفس الوشوش ونفس الضحكة الصفرة ونفس الإستفزاز … والمفروض بيساندوا ضد الإرهاب( ارهاب ايه ده هما اسخم منه ) .. هم تقيل وركب على نفسنا وافتكرت لما راحوا شجوا المنتخب وساندوه لحد ما نحسوا الكورة كلها يخربيتهم … طب في الكورة ماشي ماهما بيحبوها برده بس عند الريس واستوب بقه اقطموا كده مش ناقصين نحس ،
يعني sorry فنانين إيه اللي يدعموا الريس ما بلاش قرف بقي وخنقة وزهق الله يباركلكم ده يوم ما بيدعموا المنتخب بيشيل شيلة السنين يعني بالعربي كده وشهم فقر ويقطعوا الخميرة من البيت فمش ناقصين قدم فقر بقي.

يعني أنا كا مي ما عنديش أي مانع والله إن النخبة الجميلة من نواب الشعب المخلصين والفنانين الجامدين والإعلاميين الصادقين يساندوا الريس ويعملوا فديو فصيل يجيب جلطة علي الأقل كأنهم فتحوا عكا ماهو طبعا يعني لازم يساندوه مش ريسهم حقيقة لازم نقبلها ،
مع أني بعرف أساند وأهتف وأقول معاك ووراك وجمبك وأنا بضيق في عنيه الاثنين و رافعه أيدي اللي شققت من شغل البيت و محلتيش أعملها بوتكس و لا أركب ضوافر ولا اضرب شعري سبعتلاف لون وهيكون من قلبي و بجد مش تمثيل ولا مصالح ولا خدت منها حاجه ولا منتظرة … معنديش إي مانع في دا كله بشرط واحد بس ،
إننا ناخد النخبة اللطيفة وكدابين الزفة هما هما بعبلهم كده نطلعهم زيارة كام يوم لدعم جنودنا في شمال سينا والترويح عن نفسهم اللي طفحه الكوته في الشمس ( معلش اللي راح في روسيا في عز الثلج يتحمل الحر ) ،
وزيادة في إظهار الحب والوطنية أقترح أن تشمل المزارات بقه رفح والعريش والشيخ زويد والمساعيد وكل مناطق الاشتباك الحدودية ماهو ده تأييد ومساندة .

وعشان مصلحة الوطن نرتب زيارة لكل كمين على طرق الصعيد في الجبل عشان ولادنا من الأمن المركزي ناقصين دعم جامد هناك ماهما تبع الريس والله .

ولأنهم بيحبوا الوطن بجد نظبطلهم كام زيارة بإقامة و إعاشة لحي الاسمرات في المقطم ومنطقة السماكين في سوهاج وتحيا مصر والبشاير وكل المناطق العشوائية محتاجين دعم والله وكمان يظهروا الانجازات بقي وهما يعملوا لايف مشترك هيبقي جامد .

وبالمرة كام زيارة للمشاريع القومية للقوات المسلحة دول سند الوطن يا جماعة في الصحرا كده عشان رفع همم الرجالة الشقيانة و اللي محدش سامع عنها حاجه خالص وعلي فكرة هما كده برده بيدعموا الريس اقسم بالله .

ولأن الوطن يناديكم يانخبتنا مش هتبخلوا بزيارات لدور الأيتام عشان محتاجين عشرين اموواه، وكمان المستشفيات الحكومية اللي محتاجين مستشفيات عشان صحة الوطن ، والمدارس الحكومية اللي ناقصها مدارس عشان تعليم الوطن .

وبدل ما قارفين اللي جابونا طول رمضان اتبرع اتبرع اتبرع وكل واحد لابس لبس يبني برج 20 دور … يتبرعوا هما بقه مش نخبتنا و واجهتنا اللي مشرفانا ومشرفة مصر اللي بيحبوها من جوه قلوبهم والوطنية بتشر منهم، وبيدعموا الريس بالقوي
يبقى يدعموا مصر الوطن جوه بره … زي ما سافروا روسيا وخدوا vip في المقصورة واتصوروا وهما بيضحكوا كده ومنشكحين ، ونزلوا صورهم على مواقع التواصل في سعادة وهما وشوش محروقة شبعت سفر واوتيلات وتصوير وأضواء وفشخرة كدابة ومساندة اي حد هياكلهم ويشربهم ، مش لازم إحنا اللي نتحمل ونذاكر ونحبط ونشتغل ونساعد ونتبرع ونصرف وندعم ونطفح المرار .
وبعدين ما تنزلوا الاسمرات وأسمعوا اهالي العشوائيات اللي كانت في الشارع في صفيحة وهي بتسانده …
انزلوا القري واسمعوا الناس اللي خفت من فيروس c بعد ماكانت هتموت وهي بتسانده …
انزلوا للشباب اللي نزلت معانا شافت المشاريع دي بعنيها واتصورت وسطها من وهي لسه رمله وشافت التعب والجهد والمردود وهي بتسانده …
انزلوا للعمال اللي اتفتحت بيوتها من شغلها في الصوب والمجمعات والبنا والتطوير وكلت لقمه حلال واتأمن عليها كمان وبقي ليها ضهر وهي بتسانده …
انزلوا الصعيد واسمعوا الناس اللي خدت معاشات تكافل وكرامه واتعفت عن الحاجه واتسترت وهي بتسانده …
انزلوا المستشفيات الجديدة انزلوا المدارس الجديدة انزلوا العمارات الجديدة هتلاقوا مش بس سند لا ده كمان دعوات صادقة وبجد من القلب مش رياء ونفاق من شلة معاهم معاهم عليهم عليهم .

الخلاصة
انا معاكم أهو لو النخبة وافقت علي المساندة الوطنية والله ساعتها هكون أول واحدة تحب نخبتنا الوطنية وهديها ومن قلبي كل قلبي امواااه … ولو رفضوا – وده العادي يعني – يبقى وقتها هتعرفوا وحدكم الوطنجية وياريت وقتها تبطلوا اسلوب عهد مبارك ده معدش بيفرق بالعكس بيجي بالسلب اصلا ونتغيروا وتطوروا من نفسكم غرقتم الريس باعلامكم التافه وكلامكم العبيط وتأيدكم الأعمي لأي رئيس عشان لقمة عيشكم ونفسكم ومصالحكم بس مش عشان البلد خالص سواء أنتم أو شلة الإعلاميين إياهم إلا من رحم ربي ، وياسلام لو تختفوا من حياتنا ومش عايزين من وشكم مساندة وسيبوا الريس في حالة يا نخبة الأمووواه

شاهد أيضاً

.النائب أحمد رفعت يهنئ الرئيس السيسي والقوات المسلحة والشعب المصري بذكرى انتصارات حرب أكتوبر المجيدة

.كتب :خالد الشناوى النائب أحمد رفعت، عضو مجلس النواب يُهنئ، السيد الرئيس/ عبد الفتاح السيسي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *